Tuason mikompisal na batok sa 2 ka senador
Gisuta pa sa Regional Tripartite Wages and Productivity Board (RTWPB) kun angay ba nga dugangan ang suhol sa mga trabahante sa pribadong kompaniya karong panahona.
Kun kauyonan ang paghatag og umento sa sweldo, pila man usab kaha?
Duha ka grupo sa pamuo ang misang-at og buwag nga petisyon, ang usa nagdemanda og kapin sa usa ka gatos ka pesos nga dugang sweldo matag adlaw samtang ang laing usa nangayo og P90 nga usbaw.
Hinuon ang management nanghulga na nga manaktak sila og kawani kun pugson sila pagpaumento og daku nga suweldo, busa maayo nalang kun mosugot sila nga may P5 o P10 ang ihatag nila nga umento.
* * *
Ang University of the Philippines (UP) ug Ateneo University mopasiugda nga ang pagsugod nila sa klase himuon unya na sa Agusto ning tuiga.
Kini bisan pa kun wala pa aprobahi sa Commission on Higher Education (CHED) ang maong lakang.
Hinuon lig-on og baruganan nga gisandigan ang mga tagdumala sa maong mga tunghaan kay gibase nila ang tanan sa gitawag og “economic integration†sa ASEAN karong tuig 2015.
Matud pa nga sa tanang sakop nga nasud sa Association of Southeast Asian Nations, ang Pilipinas ray magsugod og klase sa buwan sa Hunyo samtang ang ubang nasud magsugod sa ilang klase sa Agusto, Septiyembre ug Oktobre.
Busa kun manginlabot kita sa economic integration, nganong mosukwahi man kita kanila?
* * *
Ayay, murag maglisud g’yud paglingkawas ang duha ka senador sa ilang kalambigitan sa P10 Billion nga pork barrel fund scam karon nga mitunga na si Ruby Tuason, ang tigkobra sa ilang kickback gikan sa PDAF nga gimaniobra ni Janet Lim-Napoles.
Si Tuazon mikumpisal na man ngadto sa Department of Justice (DOJ) sa iyang nasayran kabahin nila ni senador Juan Ponce Enrile ug Jinggoy Estrada.
Kini tungod kay matud pa ni Tuazon nga gusto niyang malimpyo ang iyang konsensya ug magpuyo siyang malinawon.
Hinuon tinuod g’yud nga linaw ug luwas si Tuazon kay binantayan siya pag-ayo sa kagamhanan ubos sa Witness Protection and Benefits Program.
Ambot kaha kun may mapriso ba niining mga kasoha nga pulos man abtik ug banggiitan kining mga nalambigit sa giingong pagpadahili sa minilyon ka pesos nilang PDAP, di sa mga proyekto alang sa katawhan, kun dili sa ilang bulsa.
- Latest
- Trending
