Nakasugat ko og daghang abogado. Tungod sa mga kaso nga akong giatubang ug mga transaksiyon nga gisudlan. Lahi ang ilang estilo. Ug lahi sang bayranan.
Unang abogado nikuha nakong testigo sa bag-o pang reporter sa radyo. Gipaubos ko niya og repaso. Gibombardiyohan og mga pangutana ug gitudloan og mga paagi sa pagtubag. Apil sa repaso ang kalit nga pagbundak sa iyang tingog, paglakaw-lakaw, pagtalikod, ug kalit nga paghamag. Wa mi problema sa aktuwal nga husay. Ug nakatabang to nako sa way kinutobang mga lalis nga nasugatan sa akong trabaho.
***
Ikaduhang abogado wa magpabayad sa pag-atiman sa akong mga kasong libelo. Bisan sa kahinog na sa propesyon, bisan nahimo nang piskal sa batan-on pa, gikonsulta ko niya unsaon pagtubag ang mga pasangil batok nako. Dihang gikiha ko sa layong lugar, nangadlawon og hapit nako sa iyang sakyanan aron makaabot mi sa husay sa sayong buntag.
Pero wa siyay staff. Kasagaran akoy nihatod sa among mga mosyon. Mga abogado sa gamhanan namong kaatbang nakugang (usa nila naluoy og dyutay) nga akoy nangunay pagtunol sa ilang kopya sa among mga dokumento.
***
Ikatulong abogado maoy nisawo sa akong kaso pag-apelar sa Korte Suprema. Gihangyo sa iyang higala nga tabangan ko ug paninglan lag gamay. Wa mi magkita. Nag-istorya ra sa telepono. Gilista niyang tanang dokumento nga kinahanglang ipadala sa di pa mapupos ang lugway.
Mas gamay tinuod ang iyang singil: 50% i-bank transfer dayon ug ang laing 50% human sa kaso. Daog o pilde. Nidaog mi. Kay wa man koy trabaho, nagdata-data pa ko niya sa balanse.
***
Ika-upat ang labing masilakong bupete sa Sugbo. Dihang gikonsulta unsay ilang ikatabang sa among organisasyon, posturawo ang mga abogado ug abogada nga nitubag sa among mga pangutana sa pipila ka tigom sa mahalong restaurants nga gipili ug gibayran sa among kaubanan.
Dihang nakahukom mi pagkuha nila, gipadad-an dayon sa mga termino sa kontrata. Nasuyop akong pagtagad sa bayranan: ?200,000 inig dawat sa kaso ug ?4,000 kada abogado/abogada sa sunod nga mga tigom. Nahinayak na man, piyongan na lang. Mohangyo unta mahimo bang di na makigkita nila. Pero giingnan kong bisan sa Zoom pabayron gihapon.