Healthcare worker sa gobyerno nipahibawo nako nga siya ug iyang pamilya na-schedule unta nga magpabakuna batok sa COVID-19 sa niaging buwan: Siya ug iyang mga ginikanan para sa ikaduha nilang booster shots; ug ang iyang anak para sa una niyang booster dose.
Pero wa sila modayon. Kay ang mga bakuna para sa booster doses pulos extended: Ang termino sa Department of Health (DOH) sa mga bakuna nga ni-expire na pero gilugwayan sa Food and Drug Administration (FDA) ang ka-epektibo. Iyang nahibaw-an nga ni-expire ang mga bakuna niadtong Hulyo karong tuiga.
***
Nangutana siya kon mahimo ba nga ang bakuna lang nga wa pa mo-expire ang ihatag nila. Gitubag siya sa mga tagduma sa vaccination site nga maoy sugo sa DOH nga una ipahurot ang nahibiling “extended” nga Pfizer sa di pa sila hatagan og mas bag-o nga mga bakuna.
Iyang nahibaw-an nga ang extension sa ka-epektibo sa Pfizer hangtod sa sunod buwan, Oktubre. Giingnan siya sa mga tagduma nga pulos “extended” ang mga bakuna nga gitanyag sa ubang vaccination sites ug ubang lungsod ug syudad tungod sa sugo sa DOH.
***
Nagtuo siya nga usa ni sa mga rason nganong mingaw ang pagpamakuna batok sa COVID-19 sa Sugbo ug ubang bahin sa Pilipinas. Pagkahibawo sa katawhan nga “extended” ang mga bakuna, sama sa iyang pamilya, nisibog. Kay nagduda nga ang expired nga mga bakuna, bisan sa pasalig sa DOH ug FDA, di na makahatag nila og proteksiyon batok sa kagaw.
Bisan kapila pa usbon ang ngan sa kampanya, bisan kapila pa usab-usaba ang target nga gidaghanon sa mabakunahan, mapakyas ang kampanya kon di matubag ang pagduda.
***
Nakahinumdom siya nga sa unang hugna sa pamakuna, mga ambulansiya ang nikuha sa mga bakuna gikan sa DOH. Nag-wangwang paingon sa destinasyon aron daling moabot ug mabalhin dayon sa freezer nga mopreserbar sa ka-epektibo.
Karon nakit-an nila nga nanuroy sa kabarangayan ang vaccination teams nga nagbitbit na lang og mga sudlanan sa ordinaryong mga bakuna. Kaniadto, ang mga bakuna nga napagawas sa freezer gipahurot g’yud kay di na mahimong isud pagbalik. Karon, ang sobrang mga bakuna sud sa ordinaryong mga sudlanan gibalikbalik og sud-gawas sa local health offices.