Ambot tungod ba kaha sa edad, nga nanukmat nang lawas sa mga abuso sa kabatan-on, mas mabinantayon na sa akong pagkaon. Tingali sab kay di na kublan ang akong tiyan. Lahi sa una nga bisan unsay kan-on, sukol ang ginhawaan.
Gisamotan kay ang akong asawang doktora labihan kahinab-ang. Nga gisungog sa iyang katiguwangan nga di ibalik kon madagit sa mga engkanto. Maong, sugo sa maayong pamatasan, hinab-ang na sab ko. Pero kon malipat ang akong asawa, o kon mangaon sa gawas nga di siyay magbuot sa kusina, matambalan ang kamingaw sa parat.
***
Ang kahinab-ang namong magtiayon makalimtan hinuon kon makahapit mi og chicharon sa Carcar. Kay tagsa ra man, di mi ma-guilty nga magpatuyang. Bisan sa mga huhungihong nga ang gigamit biya nga mga mantika sa fastfood chains ug ang karneng baboy gikan sa China.
Maong sa tinamban nakong timbang-timbang, ang sekreto sa kahimalitan sa chicharon sa Carcar mao ang way tihiktihik nga asin ug mantika. Nakumbinser hinuon ko sa mas yanong katin-awan sa among higala: Padayong taas ang demanda sa chicharon, sama sa litson ug humba, tungod sa baboy.
***
Nausab hinuon og diyutay ang akong pagtan-aw sa chicharon dihang gihatdan sa among silingan og chicharon sa Carcar nga lahi og ngan. Di sama sa mas iladong mga ngan nga nagbansiwag sa palibot sa rotunda ug sa kadaplinan sa kadalanan dayong abot ug biya sa Carcar.
Kaingon nako nga lain na sang brand nga nagpaka aron ingnon lang nga taga Carcar. Pero nibilib ko dihang nakatilaw: Mas kagumkom ug mas humok usapon; ug mas healthy kay di sama kaparat.
***
Nipasalig ang among silingan nga iyang suki may tindahan sa Guadalupe sa Carcar. Dihang nagka-istorya mi sa mga tag-iya, ang batan-ong magtiayon nga silang Jona ug Renie, nagsusi dayon ko nganong mas lami ang ilang chicharon.
Yano ang ilang katin-awan: Lahi sa mas dagkong mga tindahan sa Carcar nga tiningob ang pagprito ug busa mabahawan kon di sama kadaghan ang mamalit, magluto lang sila kon may mag-order. Maong garantisado nga bag-ong luto ang mahatod sa ilang mga suki. Mao nay laing mga bentaha sa ilang kabatan-on: Mo-deliver sila ug naa silay FB messenger.