Atubangan sa paglab-as ni Presidente Rodrigo Duterte og gugma sa asawa nga iyang gibuwagan, napun-an ang mga babaye nga iyang gikasungi. Si Senador Leila de Lima nga napriso na ang unang nakatilaw sa kabangis sa giisip niyang panimawos sa presidente tungod sa pagsusi ni de Lima isip chairwoman sa Commission on Human Rights (CHR) sa Davao Death Squad (DDS) nga giingong gipangulohan ni Duterte sa siya pay mayor sa Davao City.
Gikasungi sab sa presidente apan nakalingkawas sa inadlaw niyang balikas ug insulto si Bise Presidente Leni Robredo. Wa tuod kairog ang impeachment complaint batok niya apan padayong wa palingkora sa gabinete.
* * *
Laing babaye nga gikabangga sa presidente nga gilung-an na sa inadlaw niyang tagawtaw mao si Ombudsman Conchita Carpio-Morales. Nga bisan paryente sa bana sa iyang anak nga si Davao City Mayor Sara Duterte iyang gipahilom dihang gibadlong sa iyang kanunay nga pagpanghulga og patay. Way nahimo ang impeachment complaint batok niya apan mapupos nang termino ni Morales karong Hulyo.
Labing giinitan karon sa presidente mao si Chief Justice Maria Lourdes Sereno. Nga dungan nga nag-atubang sa posibleng impeachment sa House of Representatives ug sa petisyon sa quo warranto atubangan sa Korte Suprema.
* * *
Laing duha ka babaye nga nasuk-an sa presidente mga langyaw: Amerikanhon si Agnès S. Callamard, Special Rapporteur sa extrajudicial killings sa United Nations High Commissioner for Human Rights; ug Gambian si Fatou Bensouda, Chief Prosecutor sa International Criminal Court (ICC).
Si Callamard gidid-an ni Duterte pag-imbestigar sa kampanya batok sa ilegal nga drugas. Samtang si Bensouda iyang gihulgang ipadakop kon moanhi sa Pilipinas.
* * *
Gawas ni Callamard, nga may doctorate sa Political Science, pulos abogada ang gikasungi sa presidente: Si de Lima gradwado sa San Beda (samang eskuylahan ni Duterte) niadtong 1985; si Robredo gradwado sa University of Nueva Caceres niadtong 1992; si Morales gradwado sa University of the Philippines niadtong 1968; si Sereno valedictorian sa UP niadtong 1984; ug si Bensouda nigradwar sa Nigeria Law School niadtong 1986.
Sa mga protagonista, si Morales (77) ang kinatiguwangan ug si Robredo (52) ang kinabataan, samtang si Bensouda 57, silang Sereno ug de Lima managsamang 58, ug si Duterte 73.