Natalio Bacalso Ave., Cebu City -- Naabtan nako ang nagprotesta nga mga drayber nga mao gyoy pagtabok gikan sa center island dinhi paingon sa rehiyonal nga buhatan sa Land Transportation Office. Gitak-opan dayon sa mga guwardiya sa LTO ang gate. Tungod sa kadaghan sa nagpunsisok nga mga drayber nisuyla sila sa dan hangtod nga ilang nababagan ang mga sakyanan gikan sa habagatan paingon sa kinapusoran sa Dakbayan sa Sugbo.
Maisugong nitulisok ang mga demonstrador sa pipila sa ilang kaubanang drayber sa public utility jeepneys nga nagpadayon pagpamasahero. Way polis ni traffic enforcer nga nisuway paghawan sa agianan. Pagkataudtaod, akong nakit-an ang trapiko nga gipasimang na lang sa pikas nga bahin sa highway.
***
Nisamot pagsulbong ang sipa nga tingog sa mga welgista pagsugod na sa pakigpung sa kadagkoan sa Pinagkaisang Samahan ng Tsuper at Opereytor Nationwide ug Bagong Alyansang Makabayan. Nipasidaan nga di libkason ang ilang protesta hangtod nga makaangkon og tukmang pasalig sa LTO nga sublion ang makalilisang nga pagburot sa mga multa sa nagkalainlaing kalapasan sa mga lagda sa trapiko.
Sunod nakong kakita sa mga sakop sa Piston ug Bayan sud na sa buhatan sa City Traffic Operations Management (Citom). Ambot tungod ba sa kabugnaw sa aircon nga nipuli sa naglingiting nga kainit sa adlaw sa gawas, kalma na silang nakigsulti nilang Citom Executive Director Raphael Yap ug Operations Chief Joy Tumulak.
***
Hingpit silang nahipos pagsud nang Cebu City Mayor Mike Rama. Klarong wa kaandam ang kasagaran nila sa naandan ni Rama nga pagpangu sa pagpanguros ug pagpangaliya sa di pa sugdan ang tanan niyang tigom.
Klarong naandam na sa mga demanda sa mga welgista, si Rama nipahibawo dayon sa iyang pagsupak sa mas dagkong multa nga gipahamtang sa nasudnong gobyerno. Gipasabot niya nga ang tumong sa multa mao ang pagtul-id di pagsilot. Nipasalig nga makigtagbo ni Transportation Secretary Joseph Emilio Abaya aron awhagon pagsubli sa lagda.
***
Human sa mubo nga tigom, napugos na sang mga welgista pagbarug pag-usab alang sa laing hugna sa pagpanguros ug pagpangaliya. Kanus-a gipahinumdoman silang Rama nga angayng magpasalamat sa Ginoo sa katahom sa Sugbo. Pagpanggawas namo, usa ka welgista nagbagulbol nga klarong namolitika lang si Rama sa pag-ulug-ulog nila. Apan may nipahinumdom nila nga lahi sa ubang politiko si Rama kamaong motuman sa iyang mga saad.
Human malipayon nga gipahibawo sa ilang kaubanan nga nahibilin sa gawas sa gate ang pasalig ni Rama, nanud ang kadagkoan sa Piston sa buhatan sa LTO. Gikuyog na ang kaubanan nilang drayber kansang mga lisensiya natanggong sud na sa pila ka buwan. Kapasanginlan ang Piston og daghang butang apan di matulisok nga nitalikod sa naapiki nilang mga sakop.
***
Email: leo_lastimosa@abs-cbn.com