Nasinati namo ang kalisod sa pakiglambigit sa Department of Public Works and Highways (DPWH) ug sa pribadong kontraktor pagsusi namo sa sibaw nga mga reklamo sa mga molupyo ug mga motorista nga natanggong tungod sa pagtrabaho sa circumeferential road sa Dakbayan sa Lapu-Lapu. Wa namo ikaabot sa dan nga ilang gitrabaho sa Mactan ug Maribago ang mga tagduma sa proyekto--ang representante sa kontraktor ug ang superbisor sa DPWH. Wa sab namo sila matsambahi sa mga linya sa telepono nga gihatag sa ilang kaubanan ug kahigalaan.
May mga kawani hinuon sa DPWH nga nihatag namo og kasayuran. Apan may hapin nga wa sila direktang mahilambigit sa proyekto busa di daghan ang ilang nahibaw-an.
***
Napugos ko pagdangop sa ilang website (dpwh.gov.ph). Maong nahibaw-an nako nga gitipak-tipak ang higanteng proyekto ngadto sa nagkalainlaing kontraktor. Apan ang ngan sa kontraktor nga akong nakuha wa malista sa website. Naglisod sab ko pagbanabana asa nga tipak sa proyekto ang labing gireklamohan.
Nisangko ko sa pahina nga gitanyag sa website alang sa mga reklamo. Gisuwat ang tibuok nakong ngan, gipabuhagay ang tanang reklamo nga among nadawat ug gipakapin ang among kaugalingong pait nga kasinatian sa pag-agi sa dan. Dihang way tubag nga nadawat human sa pipila ka takna, nitahan ko sa pagduda nga nasobrahan rang akong bilib sa makiangayong kausaban nga gihimo sa liderato sa DPWH.
***
Maong nakugang ko pagkadawat og suwat sa DPWH pagpatin-aw sa kalangay ug kahasol sa proyekto. Nadawat nilang akong reklamo niadtong Pebrero 27, 2014, nitubag ang buhatan ni DPWH 7 Director Ador Canlas pagka Marso 6, ang 1st endorsement paingon sa ulohang buhatan gipetsahan og Marso 13, ug salamat sa gikaintapang Philippine Postal Corporation (PhilPost) nadawat nako sa Marso 25 na.
Wa abti og semana ang ulohang buhatan sa DPWH pagduso sa reklamo ngadto sa DPWH 7. Kapin sa semana una nakatubag ang DPWH 7. PhilPost nay nitanggong sa suwat gikan sa Marso 14 hangtod sa Marso 25.
***
Mosunod ang bag-ong mga detalye nga akong nabasa sa suwat sa DPWH:
"Gisugdan ang proyekto niadtong Abril 2, 2013 ug gitakda untang matapos niadtong Disyembre 7, 2013 apan gilugwayan hangtod sa Marso 7, 2014;
"Tungod sa kalangay sa kontraktor, Henry S. Oaminal Construction and General Merchandise, giluwatan sila og mga notisya sa negative slippage niadtong Oktubre 25, 2013 ug Nobyembre 28, 2013 ug niadtong Pebrero ning tuiga nakaplagan nga may slippage nga 15.90%;
"Gibasol sa kontraktor ang pagsigeng uwan, kakuwang sa alternatibong mga agianan ug truck ban nga maoy nakapahinay sa ilang trabaho ug sa grabeng kahuot sa trapiko; apan
"Way hisgot may silot bang napahamtang o ipahamtang batok sa langayan ug nagpataka-lang-og-dasmag nga kontraktor. leo_lastimosa@abs-cbn.com