Di ang pagpakita matag karon ug unya sa mga sakop sa SWAT sa tugkaran sa iyang buhatan, ni ang kahigayonan nga moggamit og puwersa ang kapolisan batok niya, ang makapapahawa ni suspendidong Gobernadora Gwen Garcia gikan sa Kapitolyo.
Boluntaryong mokanaog si Garcia. Bahala na kon nakapasidaan nga magpakamatay siya sa iyang buhatan. Bahala na kon nakasaad nga panalipdan niya ang mandato nga nadawat di lang sa usa, ni sa duha, kon dili sa tulo gyud ka piniliay. Mobiya si Garcia kay, human sa usa ka buwan nga pagtanggong sa iyang kaugalingon sa Kapitolyo, wa na siyay laing kapilian.
***
Mangahas ko sa paglista sa mosunod nga upat ka hinungdan nga maoy makakumbinser ni Garcia nga mas maayo ang pagtun pagbalik sa iyang mga gipanulti:
• Gidawat sa kinabag-an sa mga Sugbuanon ang iyang pagkasuspenso. Lisod ning dawaton ni Garcia, apan kon tinuod pang iyang pangangkon nga lapad ang protesta batok sa giisip nga pagpanggukod niya, matag adlaw ug gabii untang magpunsisok ang iyang mga dumadapig nga magtapok atbang sa Kapitolyo ug wa untay bisan unsang paghigpit nga makapugong nila sa kusganong pag-awhag nga ibalik siya sa katungdanan. Ang mga niduaw ni Garcia mao rang iyang mga alyado, mga pundok nga direkta niyang natabangan ug hinakot nga mga molupyo nga wa gani kahibawo unsay ilang kalihokan.
• Mas daghang Sugbuanon ang nisalig ni Presidente Noynoy Aquino. Napamatud-an ni sa makabungog nga mayoriya ni Aquino ug sa pagpangiwit sa gipaluyohan ni Garcia nga si Gibo Teodoro sa piniliayng presidensiyal niadtong 2010. Ang pasangil nga gigukod siya sa Malakanyang gisukwahi sa iyang kaugalingong pangangkon nga nalangay ang palasyo pag-aprobar sa rekomendasyon ni anhing DILG Secretary Jesse Robredo pagsuspenso niya.
***
• Di makatabang sa iyang kawsa ang pagpakita sa tinuorayng panagway sa ilang pamilya. Lisod ang pagpatuo nga dinaugdaog sila kay nabantang sa publiko nga silay nidukol ug namalikas sa kapolisan, silay nagpatuyang pagpasaka og bisan unsa na lang kasong kriminal ug administratiba nga ilang nahunahunaan, silay namugos sa mga polis pagsaludo nila ug silay nanghagit og sumbagay ug nanghudlat og kaguliyang.
• Nagsugod na paglutaw ang tinagoang mga transaksiyon nga lisod ipasabot sa mga magbubuhis. Nganong nihiyos mang P2.3 bilyones nga kita nga gipahibawo ni Garcia sa iyang SOPA (State of the Province Address) sa 2012 ngadto sa P90 milyones? Nganong sukwahi sa iyang pangangkon atol sa samang SOPA nga way bisan usa ka dako nga utang ang Kapitolyo nagpanon man karon ang mga naningil sa kapin sa P200 milyones niyang utang?
***
Unsay hanig ni Garcia aron di hingpit nga mauwawan? Ang pagsayaw sa Sinulog Grand Parade. Angay hinuong kinasingkasing nga mangayo og pasaylo sa paggamit ni Sr. Sto. Niño.
***
Email: leo_lastimosa@abs-cbn.com