Bag-ong adlaw

Dibuho ni Ramon Taguchi

Gilubong ang sinaw nga kutsilyo

Sa puthaw nga sakuban

Giwangi arun adunay kilat nga mutunga

Sa langit nga natun-ugan

Nadungog ang dugdug ug kalit nga nikurog

Ang lata nga maoy nakapamata

Sa mga naghaguk nga taya

Nga nitukmod sa masilya

Padayun ang nirakrakay

Didto sa gamay nga balay

Sa kalit nga pinusilay

Nakuratan ang inasal nga sobra sa hikay

Nangatagak ang mga takuling

Ug ang mga momho nanga-igking

Uban sa sumsuman nga maskara

Nga nisagul sa mantikaong baraha

Likod sa bildo sa lapad nga banggira

Nitibi na sad ang kamatis ug okra

Sige lang kay magkita ra unya ta

Pag-ampo nga makabalik ko dinhi sa atoa

Nibugwak og ata ang nokos

Hinay-hinay nga nigawas ang kaka nga nagbukot

Bugnaw nga hangin sa akong aping nihalok

Laing adlaw sa pagpaningkamot.