Sports complex gumuho: 1 patay, 2 sugatan

Habang naghuhukay ng lupa

CAVITE, Philippines — Tatlong construction workers ang natabunan ng gumuhong lupa habang naghuhukay mula sa ginagawa nilang sports complex na ikinasawi ng isa sa Brgy. Muzon Taytay, Rizal, kamakalawa ng gabi.

Idineklarang dead-on-arrival ang biktimang si Renato Roda Radorez habang nilalapatan ng lunas ang mga kasamahan na sina Jaime Sungcados at Judino Rellesiva, pawang construction worker sa pinapagawang Taytay Sports Complex.

Sa ulat ng pulisya, dakong alas-11 ng umaga nang maganap ang insidente.

Lumalabas na habang abala ang tatlong obrero sa paghuhukay ng lupa sa nasabing itinatayong sports complex nang biglang gumuho ang kanilang hinuhukay sanhi upang sila ay matabunan.

Sa isinagawang rescue operation na umabot ng ilang oras, naiahon ang mga biktima at agad itinakbo sa Taytay Hospital subalit idineklarang dead-on-arrival ang biktimang si Radorez habang inoobserbahan ang kondisyon ng dalawang kasamahan.