Public hearings sa Local Revenue Code giusab ang schedule

CEBU, Philippines — Ang public hearings sa Dakbayan sa Sugbo sa gisugyot nga Local Revenue Code giusab ang schedule human ang mga konsehal nikwestiyon sa revenue projections nga nagpaluyo sa gisugyot nga P15 bilyones budget alang sa 2027 lakip ang mga lakang nga wala pa maaprobahi.

Imbes nga maghuwat hangtud sa Disyembre 9, 2026, ang konseho nitakda sa public hearings sa gisugyot nga ordinansa sa Nobiyembre 3, 10 ug 17, diin posible ang ikaupat nga hearing sa Nobiyembre 24 aron mahatagan og kahigayonan ang mga magbabalaod ug stakeholders sa pagsusi sa measure samtang ang budget deliberation nagpadayon.

Ang maong lakang naggikan sa mga pangutana atol sa pagbukas sa budget hearing diin si Bise Mayor Tomas Osmeña uban sa pipila ka mga konsehal nisusi sa gipaabot nga kita sa siyudad ug sa mga basehan nga nagpaluyo sa gisugyot nga plano sa paggasto ni Mayor Nestor Archival alang sa sunod nga tuig.

Si Konsehal Mikel Rama nitumbok nga ang siyudad nakakolekta og P9.07 bilyons sa 2025 ug naka-generate og P7.45 bilyones sa Septiyembre 2026, apan ang executive department nag-project kini og dul-an sa P10 bilyones sa revenue sa local sources alang sa 2027.

Matud ni Rama nga ang projections nga gipresenta ngadto sa konseho lakip ang anticipated collections gikan sa gisugyot nga Local Revenue Code naghuwat pa kini sa approval sa legislative. Gidepensahan ni Officer-in-Charge City Treasurer Emma Villarete ang mga projection diin matud niya nga gibase dili lang sa gisugyot nga ordinansa apan lakip usab sa pipila ka mga lakang alang sa pagpausbaw sa kita nga gipatuman na sa siyudad.

Matud ni Villarete, ang projections sa siyudad nagkonsidera sa expiration sa real property amnesty program niadtong Hulyo 5, ang dugang manpower nga gipakatap alang sa pagkolekta sa kita, ug ang pagkadiskobre sa mga kabtangan nga wala kaniadto gideklara o under-assessed properties.

Gipadayag ni Villarete ngadto sa konseho nga ang Treasurer’s Office niila sa properties nga wala madeklara alang sa taxation lakip ang pipila ka properties nga nakapahimulos kaniadto og tax exemption status apan sa kaulahian nadiskubrehan sa pag-inspection nga kinahanglan kining buhisan.  Gikan sa The Freeman, BDB BANAT NEWS