Kakuyaw ba

Mibahad ang Moro Islamic Liberation Front (MILF) nga mahitabo gyud ang gubat kon ang mga polis ug militar mosulod sa ilang giangkong teritoryo nga dili usa mo-coordinate kanila.

Sayo pa dunay pagduda nga si Senador Ronald “Bato” Dela Rosa tua midangop sa kampo sa MILF ug sa MNLF aron nga dili siya madakpan sa mga nangita kaniya nga mga sakop sa NBI ug kapolisan.

Si DILG Secretary Jonvic Remulla miingon nga makig-coordinate ang kagamhanan sa usa ka powerful armed group aron nga itugyan si Senador Dela Rosa sa balaod.

Matud ni Remulla nga gibanabana niya moabot sa 10,000 ka kinabuhi ang makalas kon pugson gyud sa kagamhanan ang paglusob sa dapit nga gitagoan karon ni Dela Rosa.

Si Dela Rosa nag-atubang og kaso nga Crimes Against Humanities nga gipasaka sa International Criminal Court tungod sa war on drugs ni kanhi Presidente Duterte, ug siya maoy PNP Chief kaniadto.

Apan dunay miingon nga kining gihimo sa MILF nagumikan kini kay dunay ilang mga sakop nga nagdala og armas, unya nag-uniporme og MILF uniforms, “giharang” sa mga militar ug kapolisan.

Kini maoy hinungdan nga si MILF Commander Abdulla Macapaar nga naila sa angga nga Kumander Bravo, mimando nga ang mga polis ug militar dili na basta-basta nga makasulod sa ilang teritoryo.

Sa ato pa, kon anaa gyud sa MILF magtago si Dela Rosa, lisud tuod siya madakpan, ug kon mosulod ang kapolisan ug militar, aw alegre gyud tuod kaayo ang sinukliay og mga bala.

Pero si Presidente Bongbong Marcos mimando na nga ang pagdakop ni Dela Rosa himoon nga wa kaayoy kinabuhi nga makalas.

* * *

Sumpay sa lindog nato niadtong Sabado nga gihisgotan nato ang water desalination plant sa Cordova, awhagon nato si Mayor Didoy Suan nga siguroon gyud nimo mayor nga ang paglabay sa “Brine” gikan sa planta kinahanglang adto gyud sa labing menos 200 metros gikan sa baybayon.

Kamong mga mananagat diha sa Cordova, paghugpong mo ug tan-awa kon duna ba sila’y tubo nga anha moagi ang “Brine” nga ilabay nila balik sa dagat, ug ang distansya labing menos 200 metros gikan sa daplin sa dagat.

Kay kon anha lang gani kini ipaagas ang Brine sa baybayon, mangamatay ang mga isda, mga bakasi, pasayan ug mga gasang, ug moresulta kini nga maglisud na kamo pagpangita og panginabuhian.

Ang water desalination plant usa ka paagi nga ang tubig sa dagat, himoan og paagi nga makakuha kita og tab-ang aron magamit sa katawhan, apan ang parat nga tubig, makadaot kini sa mga isda kon ang pagbalik niini sa baybayon.