Romualdez, inaresto na
Kaugnay ng P7.4 bilyong plunder case…
MANILA, Philippines — Inaresto na kahapon si dating House Speaker at incumbent Leyte Representative Martin Romualdez nang isilbi sa kanya ang warrant of arrest sa loob ng Cardinal Santos Medical Center sa San Juan City.
Isinugod at na-confine ang dating Speaker sa naturang pagamutan nitong Lunes hapon matapos umanong makaranas ng cardiovascular complication.
Kinumpirma ni Interior Secretary Jonvic Remulla na si Romualdez ay itinuturing nang Person Deprived of Liberty (PDL) habang nasa ilalim ng kustodiya ng pamahalaan sa ospital.
Nag-ugat ang pag-aresto sa P7.4-bilyong plunder case na isinampa ng Office of the Ombudsman sa Sandiganbayan kaugnay ng mga umano’y kickback at anomalya sa mga flood control projects mula 2022 hanggang 2025.
Walang inirekomendang piyansa ang Sandiganbayan Third Division para sa kanyang pansamantalang kalayaan dahil ang kasong plunder ay isang non-bailable offense. Naglabas din ang korte ng hold departure order (HDO) laban sa kanya at sa kanyang mga kapwa akusado.
Bukod kay Romualdez, may arrest warrant din sina dating Ako Bicol Party-list Rep. Elizaldy “Zaldy” Co; Joselyn Tragua Serenio at Felicito Cristobal Guevarra.
Sinabi naman ni Atty.Ade Fajardo, legal counsel ni Romualdez na maaring na-pressure lamang si dating Public Works Secretary Manuel Bonoan para idawit ang dating House Speaker sa iskandalo.
Hiniling din ng kampo ni Romualdez na magkaroon ng impormasyon sa 28 na bagong witness.
- Latest
