Kalbaryo sa Sixers natiwasan
CEBU, Philippines — Nasamotan pa ang kalbaryo nga gipas-an sa Philadelphia 76ers ning NBA season.
Kini human gipahibawo sa Sixers kagahapong adlawa nga ang sinaligan nilang forward nga si Paul George dili na makaduwa pa sa nahibiling bahin sa regular season tungod kay nakahiagum og groin ug knee injury.
Ang 34-anyos nga si George wala na mapakita'g aksiyon sukad siya mi-iskor og siyete puntos sud sa 30 minutos atol sa ilang duwa batok sa Minnesota Timberwolves niadtong Marso 5. Ang nadangatan ni George laing dakong suntok alang sa Sixers ilabi na kay dili na makabalik og duwa ang alas nilang si Joel Embiid kay na-angol sab.
Sa kasamtangan, ang Sixers usa sa nangiwit nga mga koponan sa Eastern Conference uban ang 23-45 rekord.
Gumikan sa nagkagidlay nga dagan sa ilang kampanya, hayan nga matagak ang Sixers sa playoffs sa unang higayon sukad niadtong 2017.
- Latest
