War Chief at Akroun Silver magtutulungan sa 3YO Locally Bred Stakes Race
MANILA, Philippines — Magsasanib-puwersa ang War Chief at Akroun Silver sa pagsalang sa 2024 PHILRACOM “3-Year-Old Locally Bred Stakes Race” na ilalarga sa Metro Turf, Malvar-Tanauan City, Batangas sa Hulyo 21.
Makakalaban ng War Chief at Akroun Silver ang pito pang tigasing kalahok sa event na suportado ng Philippine Racing Commission (PHILRACOM).
May distansyang 2,000 meter race, ang ibang nagsaad ng paglahok ay ang Amor My Love, Bagsikatdin, Every Sweat Counts, Jeng’s Had Enough, Louiseville, Sting at The Kiss.
Inaasahang matinding bakbakan ang masisilayan ng mga karerista dahil nakalaan ang P500K guaranteed prize na ikakalat sa unang anim na kabayong tatawid sa meta,
Gagabayan ni reigning Philippine Sportswriters Association, (PSA) - Jockey of the Year awardee John Alvin Guce si War Chief habang si Dan Camanero ang gagabay kay Akroun Silver.
Kukubrahin ng mananalong kabayo ang P300k, mapupunta sa pangalawa ang P100k habang P50k, P25k, P15k at P10k ang third hanggang sixth placers, ayon sa pagkakasunod.
Posibleng humadlang sa pakay ng War Chief at Akroun Silver na korona ay ang kalahok na Amor My Love at Every Sweat Counts.
Sisikwatin naman ng breeder ng mananalong kabayo ang P25k habang P15k at P10k ang second at third.
- Latest
