Mga nasunogan sa Lahug hatagan og hinabang sa Kapitolyo

CEBU, Philippines — Hatagan og tag P10,000 nga pinansiyal nga tabang sa Probinsiya ss Sugbo ang 42 ka pamilya kansang mga balay nasunog diha sa Barangay Lahug, Dakbayan sa Sugbo niadtong Pebrero 27, 2025.

Apan ang maong tabang dili ihatag pinaagi sa kwarta iagi kini sa quick response o QD-coded cards nga mamahimong magamit sa mga residente pagpalit og groceries ug mateiryales sa balay ngadto sa mga partner nga tindahan sa Kapitolyo.

Gawas sa maong tabang, ang Kapitolyo nisaad usab ngadto sa mga residente nga  mamahimo sila nga makabalik ngadto sa maong luna aron makatukod sa ilang balay.

Ang maong luna sa Sitio San Vicente gipanag-iya kini sa Probinsiya sa Sugbo.

Atol sa tigom sa gobernador uban kang Cebu City Mayor Raymond Garcia ug sa mga residente niadtong Marso 25, 2025, ang gobernador nitanyag nga mamahimong maka-avail og housing loan ang maong mga okupante aron hingpit na nga mapanag-iyahan ang luna nga ilang gipuy-an pinaagi sa Pag-ibig susama sa gihimo karon sa Probinsiya sa mga okupante 93-1 ug sa OPRRA.

Matud sa Kapitolyo nga human sa sunog nabalaka ang mga residente nga dili na sila tugotan nga makatukod og balik sa ilang balay diha sa luna nga gipanag-iya sa probinsiya.

"Ang atong pag-anhi diri mura ta'g nakadaog og lotto tungod kay atong gianhi diri nga makabalik pa ta. Pero unsa pagka-unsaa nga ang gi-offer sa gobernador nato dili lang nga makabalik ta, makapanag-iya pa gyud ta sa luna", padayag ni Garcia. (BANAT NEWS)