Bakit lumalaki ang tiyan ng isang tao?

HINDI lamang sobrang pagkain ang dahilan kung bakit lumalaki­ ang tiyan. Ayon sa siyensiya, may iba’t ibang proseso sa katawan na nagiging sanhi ng pag-ipon ng taba, pag-umbok ng tiyan, at paglaki ng baywang.

1. Naiipong taba sa tiyan.

Kapag mas maraming calories ang nakukuha sa pagkain kaysa sa nagagamit ng katawan, ang sobrang enerhiya ay iniimbak bilang taba. Ang ilan sa mga ito ay naiipon sa paligid ng mga laman-loob, na tinatawag na visceral fat. Ang sobrang taba sa bahaging ito ay iniuugnay sa mas mataas na panganib ng diabetes at sakit sa puso.

2. Mabagal na metabolismo habang tumatanda.

Habang nagkakaedad, maaaring bumaba ang muscle mass at ang dami ng enerhiyang ginagamit ng katawan. Kapag hindi nababago ang pagkain at pisikal na aktibidad, mas madaling madagdagan ang timbang at taba sa tiyan.

3. Epekto ng hormones.

Ang pagbabago sa hormones, lalo na habang tumatanda at sa panahon ng menopause sa mga babae, ay maaaring magpabago sa distribusyon ng taba. Maaari itong magdulot ng mas maraming taba sa paligid ng baywang.

4. Madalas na pagkain ng matatamis at matatabang pagkain.

Ang mga pagkaing mataas sa calories, gaya ng matatamis na inumin, cake, fast food at pritong pagkain, ay maaaring magpataas ng timbang kapag madalas at sobra ang pagkonsumo.

5. Kakulangan sa ehersisyo.

Kapag kulang ang pisikal na aktibidad, mas kaunting enerhiya ang nagagamit ng katawan. Maaari ding bumaba ang muscle mass, kaya mas madaling maipon ang taba kapag sobra ang calories na nakukuha sa pagkain. (Itutuloy)