‘Muning’ (Part 2)

HINDI umaalis ang pusa sa gate. Talaga yatang binabantayan ang pagdating ko. Hindi ko pinansin ang pusa kahit nakatingin sa akin.

Binuksan ko ang gate at agad na sinara para hindi makapasok. Pero sa tingin ko naman ay walang balak pumasok ang pusa. Nanatiling nasa may gate at titingin-tingin lang sa akin.

Nang tumagal, nakaramdam ako ng awa sa pusa at binigyan ng pagkain—kanin na may laman ng manok. Binigyan ko rin ng malinis na tubig sa plastic tray.

Agad inubos ang pagkain. Gutom na gutom palagay ko.

Mula nang bigyan ko ng pagkain, ay hindi na umalis ang pusa sa gate. Kaya regular ko nang binibigyan ng pagkain.

Pero hindi ko siya pinapapasok sa loob ng bakuran.

Baka mamihasa at magsama pa ng ibang pusa. Baka dun na rin tumae. Ayaw na ayaw ko pa naman ng amoy tae ng pusa.

Dahil regular kong pinakakain ang pusa, bumili na ako ng catfood.

Itutuloy