Puwede bang tanggihan ang early retirement?

Dear Attorney,

Gusto akong ipa-early retirement ng kompanya kahit wala pa ako sa mandatory retirement age. Ayaw ko pa sanang mag-retire. May karapatan ba akong tumanggi? — Gary

Dear Gary,

Oo, maaari mong tanggihan ang early retirement kung hindi ka sumang-ayon sa early retirement plan o wala itong malinaw na basehan sa batas o sa collective agreement.

Ayon sa Korte Suprema sa kasong Pulong v. SMI (G.R. No. 247819, 14 October 2019), ang early retirement ay resulta ng isang boluntaryong kasunduan sa pagitan ng employer at empleyado.

Sinabi ng Korte: “Retirement is the result of a bilateral act of the parties, a voluntary agreement between the employer and the employee… Acceptance by the employees of an early retirement age option must be explicit, voluntary, free, and uncompelled.”

Ibig sabihin, hindi puwedeng pilitin ang empleyado na mag-retire nang mas maaga sa itinakda ng Labor Code katulad ng mandatory retirement sa edad 65, o 60 kung optional.

Posible rin na may boluntaryong retirement plan na pinasok ang empleyado o pinagtibay ng karamihan ng mga empleyado sa pamamagitan ng kanilang bargaining representative.

Bukod sa mga ito, ang pagpapataw ng kompanya ng early retirement sa empleyado ay maaaring ituring na illegal dismissal kung ipipilit ng employer.

Kaya kung hindi ka sumang-ayon sa alok na early retirement plan, at hindi naman angkop sa sitwasyon mo ang mga nabanggit, may karapatan kang tumanggi.