‘Singsing’ (Last Part)
HANGGANG malaman na lamang namin ni Cora na magkahawak-kamay na kami habang naglalakad sa kanyang munting hardin na punumpuno ng mga halamang namumulaklak.
Hindi ko maipaliwanag ang kaligayahang nadama ng oras na iyon. At dama ko, pati si Cora ay ganundin ang nararamdaman.
“Dapat ko pa bang sabihin ang laman ng dibdib ko, Cora?”
“Ikaw kung gusto mong sabihin. Puwede ring hindi na.”
“Mas maganda kung sasabihin ko, Cora.”
“Sige, sabihin mo na, Ram.”
“Mahal kita, Cora.”
“Mahal din kita Ram.”
“Salamat at mahal mo rin ako. Aalagaan ko ang iniukol mong pagmamahal sa akin. Hindi ko sisirain ang pagtitiwala mo.”
“Salamat, Ram.”
Pinisil ko ang palad ni Cora.
Ginantihan iyon ni Cora ng katulad na pisil.
“Halika na sa loob. Ipagtitimpla kita ng mainit na kape,” sabi ni Cora at pumasok kami sa bahay.
Ilang araw ang lumipas, binigyan ko si Cora ng singsing. Tuwang-tuwa siya na isinuot ang singsing. Kasyang-kasya! Parang isinukat.
- Latest
