Lalaki nakarma agad nang ma-carnap ang kanyang getaway car habang nagnanakaw

MABILIS ang karma para sa isang magnanakaw nang makarnap ang kanyang getaway car habang nasa gitna siya ng tangkang pagnanakaw.

Ini-report ni William Kelley na na-carnap ang kanyang red 1992 Chevy pickup sa Kennewick Police Department sa Washington nito lamang August 25.

Iniwan niya kasi ang susi  sa loob ng sasakyan kaya natiyempuhan ito ng isang carnapper na agad itinakbo ang pickup. Tinangka pang habulin ni Kelley ang kanyang sasakyan.

May nadiskubre naman ang mga pulis nang imbestigahan nila ang pangyayari.

Nalaman nilang nandoon si Kelley sa pinangyarihan ng insidente dahil kasalukuyan siya noong nagnanakaw.

Kaya sa huli ay mas nauna pang makulong si Kelley sa carnapper ng kanyang sasakyan, matapos siyang ma-isyuhan ng warrant at arestuhin ilang araw lang matapos ang pangyayari.

Hanggang ngayon ay hindi pa tukoy kung nasaan ang sasakyan ni Kelley o ang carnapper nito.