‘Human punching bag’, patok sa China

ISANG 48 taong gulang na lalaki mula sa China ang kumikita ng $3,500 kada buwan sa pamamagitan ng pagi-ging ‘human punching bag.’

Binansagan si Xie Shuiping bilang taong punching bag dahil pinapayagan niya ang kanyang mga parukyano na siya ay suntuk-suntukin na parang punching bag sa gym.

Tumatambay si Xie gabi-gabi sa mga bar at nightclub upang makaakit ng mga customer na gustong maglabas ng galit o magbawas ng stress sa pamamagitan ng pagsuntok. Tumatagal ng 20 minutes ang pagpapasuntok ni Xie at hinahayaan niya ang kanyang mga customer na suntukin siya ng kahit gaano kalakas. Hinahamon pa nga niya ang mga ito na kung sino man ang makakapagpatumba sa kanya ay ililibre niya ng inumin pagkatapos.

Nagsimula ang raket ni Xie noong 2004. Wala siyang trabaho at pera noon kaya pumasok sa isip niya na pagkakakitaan ang kanyang mga abs na mala-bato sa tigas. Naging matibay ang kanyang mga kalamnan dahil sa kanyang mga naging mabibigat na trabaho katulad ng pagiging construction worker.

Pumatok naman ang kanyang naisip na hanapbuhay at dahil hindi naman siya nasasaktan mula sa mga suntok na kanyang sinasalo araw-araw ay ipagpapatuloy pa rin niya ang kanyang pagpapasuntok sa iba’t ibang tao para kumita.