Sakla-patay ni Lucy

FLASH report! Binabanggit ni Lito Guerra alyas Bombay, ang pangalan ni CIDG director Chief Supt. Benjie Magalong sa kanyang pag-iikot sa mga pasugalan at iba pang illegal sa Calabarzon area. Ang gamit ni Bombay na kolektor ay si Mike Viscocho. Sa pagkaalam ko umiiral pa ang ‘‘no take’’ policy ni DILG Sec. Mar Roxas sa PNP ngayon, subalit parang nilalapastangan na ito  ni Bombay at Mike. Kapag hindi kumilos si Magalong laban kina Bombay at Mike, ibig bang sabihin n’yan nalusaw na ang ‘‘no take’’ policy ni Roxas sa isipan niya?

• • • • • •

Minamatyagan naman ng taga-Caloocan City si Mayor Oca Malapitan kung ano ang hakbang niya sa sakla-patay ni Lucy Santos, ang sakla queen ng northern Metro Manila. Hanggang ngayon kasi mga kosa, di pa inaangat ni Malapitan ang kamay na bakal niya laban sa mga naglilipanang sakla-patay ni Lucy sa Caloocan City. Kapag patuloy na mananahimik si Malapitan sa isyu ng sakla-patay ni Lucy ang ibig sabihin n’yan may parating na ito sa kanya, di ba mga kosa? Ilang ulit namang sinasabi ng mga kosa ko na walang win-win situation si Malapitan sa sakla-patay ni Lucy bagkos ninanakawan pa ang mga constituents niya. Kasi nga, imbes na ipambili ng pagkain ng mga barya nila, ang mga mahihirap sa Caloocan City ay nagbabaka-sakali pa sa sakla-patay ni Lucy, di ba mga kosa? Sa totoo lang, kaya nasabi ng mga kosa ko na walang win-win situation si Malapitan sa ilegal na negosyo ni Lucy dahil ang mga kubrador niya ay panay taga-Navotas at walang gamit pagdating sa eleksiyon. At ang taga-Caloocan pa ang ginagatasan ni Lucy. ‘Ika nga, ang taga-Caloocan ang naghihirap dito sa sakla-patay ni Lucy. Hehehe! Kailan kaya magigising si Malapitan sa isyu ng sakla-patay ni Lucy? Mismo!

Kung sabagay, sinabi ng mga kosa ko sa Caloocan na winalis na ni Malapitan ang video karera nina Sacho at Oye sa siyudad niya. Si Sacho, na isang pulis-Maynila, ay lumipat sa Calamba, Laguna samantalang si Oye naman sa kalapit siyudad ng Malabon. Ayon pa sa mga kosa ko, ang lingguhang intelihensiya nina Oye at Sacho dati ay dumadaan sa kampo ni Lucy. Ano ba ‘yan? Totoo ba na P90,000 weekly ang payola ni Lucy sa opisina ni Malapitan at ang kumukubra ay ang pamangkin ni mayor na pulis? Sinabi pa ng mga kosa ko na me pamangkin din si Malapitan na nag-resign sa PAGCOR para siya na ang mamahala ng mga illegal na pasugalan sa Caloocan City? Ano ba ‘yan ? Hehehe! Kanya-kanyang raket lang ‘yan!

Kapag may nakuhang puwesto o patay pala itong girl Friday ni Lucy na si Marlyn, apat na personnel kaagad ng sakla ang ipinapadala n’ya. Ang isa ay ang balasador, may taga-lista ng taya o tumama, may tagahawak ng pera at may lookout, na taga bantay para sa financier na si Lucy nga. Sinisiguro ng mga kosa ko na parehas ang laban ni Lucy dahil sa may lingguhang intelihensiya siya. May daya kasi sa laro na sakla mga kosa na kung tawagin ay ‘‘bangkang patso’’ kung saan ang apat na personnel ay may kasama pa na ang tawag naman ay mga “pala”. Ang ‘‘pala” ang taga-taya ng koto sa mararamdaman ng balasador na tatamang kumbinasyon kaya walang mananalo sa mga parukyano. Itong baraha kasi na baon ng balasador ay may mga tanda. Get’s n’yo nga kosa? Abangan!