P17 milyong puslit na yosi nasabat sa checkpoint
COTABATO CITY, Philippines — Maagap na napigilan ng mga pulis nitong Lunes ang tangkang paghahatid ng mahigit P17 milyong halaga ng imported na sigarilyo sa mga retailer sa iba’t ibang bayan sa Maguindanao del Norte at sa Cotabato City, kapwa sakop ng Bangsamoro region.
Ayon kay Police Captain Steffie Salanguit, tagapagsalita ng Police Regional Office-Bangsamoro Autonomous Region (PRO-BAR) na naka-base sa Camp SK Pendatun sa Barangay Makir sa Parang, naharang matapos ang maikling habulan, sa Barangay Nituan sa Parang, Maguindanao del Norte, ang isang van-type truck na kargado ng mga sigarilyong gawa sa Indonesia ng mga humahabol na mga operatiba ng iba’t ibang units ng PRO-BAR
Sinabi ni Salanguit na unang tumangging huminto ang driver ng truck na may kargang milyun-milyong halaga ng kontrabando nang parahin sa isang anti-smuggling checkpoint sanhi upang magkaroon ng habulan hanggang sa ito ay maabutan.
Nakumpiska ang 300 master cases na naglalaman ng 15,000 reams ng Fort brand na sigarilyo na maayos na nakasalansan sa cargo deck ng van-type truck, na walang mga kaukulang dokumento ng kargamento.
Ayon kay Salanguit, ang driver ng nasabat na truck na si Khalid Masi, ng Barangay Bugasan Norte, Matanog, Maguindanao del Norte ay nakakulong na at nakatakdang kasuhan sa tangkang cigarette smuggling at sa pag-iwas nito sa checkpoint.
- Latest
