Lalaking nangreyp ng nobya, arestado

VIRAC, Catanduanes, Philippines — Arestado na ang itinuturing na No.6 regional most wanted person (MWP) ng Bicol Police dahil sa Makailang ulit na panggagahasa nito sa kanyang nobya sa Caramoran, Catan­duanes matapos matunton ang pinagtataguan ng mga operatiba ng PNP-Criminal Investigation and Detection Group (CIDG) sa Brgy. Pandan, Angeles City, Pampanga kamakalawa ng umaga.

Hawak na ng CIDG-Catanduanes Provincial Unit ang suspek na kinilalang si alyas “Sid”, residente ng Brgy. Gandus, Mexico, Pampanga, na may kinakaharap na 3-counts of rape na isinampa mismo ng kanyang naging kasintahan sa Virac Regional Trial Court makaraang abusuhin nito ang biktima sa Brgy. Tucao, Caramoran, Catanduanes noong ­Hunyo 21,2020.

Ayon kay Major Joven Osurman, provincial officer ng CIDG-Catan­duanes Field Unit katuwang ang mga tauhan ng San Narciso Municipal Police Station, Zambales Police Provincial Office, Regional Intelligence Unit 5, Catanduanes-PNP Maritime Law Enforcement Team, Bato at Caramoran Police, at Regional Mobile Force Battalion 5, bitbit ang warrant of arrest na inilabas ng korte at sa ilalim ng “Oplan:Pagtutugis” dakong alas-9:45 ng ­umaga ay sinalakay nila ang kina­roroonan ng suspek na anim na taong nagtago.

Hindi na nakapalag ang naturang regional MWP nang silbihan siya ng pulisya ng warrant of arrest.