Lava patuloy ang pagdaloy sa Bulkang Mayon

MANILA, Philippines — Patuloy ang pagdaloy ng lava sa mga dalisdis ng bulkang Mayon sa Bicol partikular sa Basud, Bongga at Mi-isi gullies na may panaka-naka at mahinang dagundong at panandaliang lava fountaining mula sa ­bunganga ng bulkan,

Ayon sa Philippine Institute of Volcanology and Seismology (Phivolcs) nagtala din ang bulkan ng 71 volcanic earthquakes kabilang ang 39 volcanic tremors at 421 rockfall events at 6 na pyroclastic density current signals o uson.

Nakikita rin ang crater glow sa bunganga ng bulkan at ang pagluwa ng asupre na nasa 889 tone­lada at mahinang pagsi­ngaw na nasa 750 metrong taas na napadpad sa kanluran-timog-kanluran bahagi ng bulkan.

Nagkaroon din ng panandaliang pag-impis ng bulkan na may nagsisimulang pamamaga sa hilagang-silangang bahagi nito.

Bunga nito, patuloy na ipinagbabawal ng Phivolcs ang pagpasok ng sinuman sa loob ng anim na kilometrong (6 km) radius Permanent ­Danger Zone at paglipad ng anumang uri ng aircraft dahil sa banta ng pagguho ng bato, pagtilapon ng mga tipak ng lava o bato, pag-agos ng lava, Uson at katamtamang pagputok gayundin ang pag-agos ng lahar kung may ma­tinding pag-ulan.

Ang Bulkang Mayon ay nananatiling nasa alert level 3 na nangangahulugan na may mataas na aktibidad ang bulkan.