Karpintero, utas sa pananaksak ng katoma

BAYOMBONG, Nueva Vizcaya, Philippines — Binawian ng buhay ang isang karpintero matapos pagsasaksakin ng kanyang kainuman sa Barangay Lamo, Dupax del Norte sa lalawigang ito kamakalawa ng hapon.

Kinilala ng Dupax del Norte PNP ang suspek na si alyas “Waway”, 31, residente ng Purok Kasantolan, Barangay Mabasa habang ang biktima naman ay nakilalang si Leo Pico Jr., 59, residente naman ng Purok Hollywood North sa nabanggit na Barangay.

Sa inisyal na imbestigasyon ng pulisya, habang nag-iinuman ang suspek at biktima kasama ang ilang mga kaibigan nang biglang umalis ang suspek sa hindi malaman na dahilan. Agad ding siyang bumalik na may hawak nang kutsilyo at walang sabi-sabing pinagsasaksak ng tatlong beses sa likuran ang biktima.

Naisugod pa sa pagamutan ang biktima subalit binawian din ito ng buhay.

Agad naman na nadakip ang suspek na nahaharap ngayon ng kaukulang kaso.