16 pulis-Cavite inireklamo sa Napolcom
Sa ilegal na pag-aresto sa 18 katao
BATANGAS , Philippines — Isang grupo ng mga karpintero, manggagawa at security guard ang nagsampa ng dalawang set ng reklamong administratibo sa National Police Commission (Napolcom) laban sa 16 na tauhan ng Dasmariñas City Police dahil sa umano’y ilegal na pag-aresto at paglabag sa police procedures.
Ayon sa 18 na nagreklamo, sila ay nagtatrabaho sa isang property sa Dasmariñas City nang sapilitan silang pahintuin at arestuhin ng mga pulis kahit walang nagagawang krimen at walang legal na batayan o warrant of arrest.
Ikinuwento rin nila na pagdating sa himpilan ng pulisya ay iginapos at itinuring silang mga suspek nang hindi ipinaalam ang dahilan ng pag-aresto, na nagdulot umano ng takot at kahihiyan.
Pansamantalang hindi pinangalanan ang mga pulis habang isinasagawa ang imbestigasyon.
Ayon sa abogado ng mga manggagawa na si Atty. Manuel Ventura ng MVP Law Firm, inihain ang mga reklamo upang matukoy ang pananagutan ng mga pulis batay sa ebidensya at sa tamang proseso ng batas.
Sa reaksyon naman ni Dasmariñas police chief Lt. Col. Resty Soriano sa pamamagitan ng kanyang desk officer na si Police Corporal Norman Lejada, wala pa umano silang natatanggap na pormal na complaint mula Napolcom kaya hindi pa sila makapagbibigay ng kanilang komento tungkol sa kaso.
- Latest
