Bicol inalerto sa lahar dahil sa bagyong Ada
LEGAZPI CITY, Albay, Philippines — Agad isinailaim sa red alert status ang buong Bicol at nagsagawa ng pre-disaster risk assessment ang Regional Disaster Risk Reduction Management Council kasama ang iba’t ibang ahensya at inalerto ang lahar ng lokal na pamahalaan sa peligrong dala ng paparating na bagyong Ada.
Partikular na inalerto ng OCD-5 ang Albay Provincial Safety and Emergency Management Office at ang lokal na pamahalaan ng lalawigan sa posibleng pagragasa ng lahar.
Pinayuhang siguruhing ligtas ang mahigit 4 na libong evacuees na lumikas dahil sa pag-aalboroto ng bulkang Mayon at magsagawa ng kaukulang hakbang sa iba pang mga residente laban sa pagragasa ng lahar.
Sa iba’t ibang lugar naman sa rehiyon na bahain, may peligro sa landslides at iba pang hazards ay pinayuhang magsagawa ng agarang preemptive evacuation.
Kasama sa agad inihanda ang resources ng Department of Social Welfare and Development para sa pagtugon sa maaapektuhan ng paparating na kalamidad.
Simula kahapon ay umabot na sa 1,831 ang stranded na pasahero at 620 rolling cargoes ang nakapila na sa loob at labas ng iba’t ibang pantalan sa Bicol makaraang itigil ng Philippine Coastguard ang paglalayag ng mga barko.
- Latest
