2 Chinese huli sa human trafficking, 11 nasagip
MANILA, Philippines — Arestado ng Philippine National Police (PNP) ang dalawang Chinese national habang nailigtas naman ang 11 indibdiwal sa ikinasang anti-human trafficking operation sa Trece Martires City, Cavite kahapon ng umaga.
Sa report na tinanggap ni PNP Acting Chief PLtGen. Jose Melencio Nartatez, Jr., nakilala ang mga suspek na sina Tony Sia Lao, residente ng Masbate City, at Erwin Torres Sy ng Pasay City.
Ang joint operation, na pinangunahan ng Regional Intelligence Division 4A (RID 4A) Special Team at Regional Intelligence Team Cavite, ay ikinasa sa non-operational recreation at leisure park sa Barangay Aguado, Trece Martires City dakong alas-6 ng umaga bsa bisa ng search warrant na inilabas ni Executive Judge Angelina A. Mailom-Orendain ng RTC Branch 92, Calamba City, Laguna dahil sa paglabag sa Republic Act No. 10364 o Expanded Anti-Trafficking in Persons Act of 2012.
Suot ng mga operatiba ang kanilang body-worn cameras (BWCs) at sinaksihan ng local barangay officials ang naturang operasyon.
Nasagip sa operasyon ang 11 lalaking manggagawa kabilang ang 17-anyos na lalaki, na napaulat na ni-recruit mula Masbate at karatig-lugar saka iligal na pinagtrabaho.
Pinuri ni Nartatez ang mabilis at coordinated efforts ng operating teams, na binubuo ng mga tauhan ng Department of Labor and Employment sa Region 4A (DOLE 4A), Regional Mobile Force Battalion 4A (RMFB 4A), 401st Maneuver Company, Tactical Support Company, Cavite Provincial Mobile Force Company, City Social Welfare and Development Office of Trece Martires City, at mga kinatawan ng Philip Morris Manufacturing Philippines Inc., at Trece Martires City Police Station.
- Latest
