Rider na nawala, natagpuang patay

MANILA, Philippines — Dahil sa nakakabit na GPS sa motor ng isang rider ay nadiskubre ang katawan nito sa bakanteng lote sa Brgy. San Gabriel,GMA Cavite, kamakalawa ng hapon.

Ang biktima ay kinilala sa alyas na “Jay”, 31, residente ng Naic, Cavite.

Sa ulat ng pulisya, alas-3:30 ng hapon nitong Huwebes nang matagpuan sa bakanteng lote ng  Go Compound sa nasabing barangay ang bangkay ng biktima.

Ayon sa pulisya, iniulat sa Naic Police nitong Hulyo 2 ng pamilya ng biktima ang pagkawala nito noong Hunyo 27 taong kasalukuyan.

Dala umano ng biktima ang motor nito at dahil sa GPS na nakakabit dito na-track ang kinaroroonan nito.

Kasalukuyan nang nagsasagawa ng follow-up ang GMA at Naic police hinggil sa insidente.