Pulis-SAF lasog sa salpok ng motor

CAVITE, Philippines — Patay ang isang aktibong miyembro ng PNP-Special Action Force (SAF) na lulan ng motorsiklo makaraang salpukin ng isa pang motorsiklo habang bumabagtas sa kahabaan ng Gen. Aguinaldo Highway, Brgy. Panapaan 2, Bacoor City.

Hinihinalang papasok na sana sa kanyang duty ang biktima na kinilalang si Police Master Sergeant Tito Lacambra Jr., 39-anyos, residente ng Blk 19 Lot 5 Cyber Ville, Santiago, Gen. Trias City, Cavite, nang maaksidente.

Sa ulat ng pulisya, binabagtas ng biktima ang nasabing highway patungong Maynila sakay ng kaniyang motorsiklo nang salpukin ito ng kasalubong na isa ring motorsiklo na minamaneho ng isang alyas Rodolfo, residente ng Palm Grove Village, Buhay na Tubig, Imus City, Cavite at patungo umanong Imus City, Cavite.

Sa lakas ng salpukan, tumilapon ang biktima at sumadsad sa espaltadong kalsada. Nagtamo siya ng mga bali at gasgas sa katawan at matinding pinsala sa ulo.

Naitakbo pa ang naturang pulis sa St. Dominic Hospital and Medical Center subalit hindi na naisalba pa ng mga doktor.  

Nahaharap sa kasong Reckless Imprudence Resul­ting in Homicide and Damage to Property ang suspek na kasalukuyan na ngayong nakakulong.