Trike driver dedo sa bangga ng bus

PAGBILAO, Quezon, Philippines — Hindi na umabot pang buhay sa ospital ang isang tricycle driver matapos mabangga ng pampasaherong bus sa Barangay Pinagbayanan sa bayang ito, kahapon ng hatinggabi. 

Sa inisyal na imbestigasyon ng mga awtoridad, bandang alas-12:05 ng ha­tinggabi, binabagtas ng hindi tinukoy na pangalan ng kumpanya ng bus ang paahon at kurbadang bahagi ng daan nang masalpok nito ang kaliwang bahagi ng kasalubong na tricycle na minamaneho ni alyas “Elmer”.

Naisugod pa sa isang ospital sa Lucena City si Elmer subalit idineklara ring dead on arrival.

Nasa kustodiya na ng Pagbilao Police Station ang bus driver na si alyas “Magno” at nahaharap sa reklamong reckless imprudence resulting in homicide.