Obrero dumalaw sa ex-GF, kinatay ng karibal
Madugong love triangle
MANILA, Philippines — Isang obrero ang patay nang katayin ng kasalukuyang live-in partner ng kanyang dating nobya na dinalaw niya sa Taytay, Rizal kamakalawa.
Kaagad na binawian ng buhay ang biktimang si Joshua Espinida, 29, ng Maiba, Teresa, Rizal dahil sa mga saksak sa iba’t ibang bahagi ng katawan.
Nakatakas naman ang suspek na nakilala lang sa alyas na “Roden”, 31, ng Brgy. Dolores, Taytay, Rizal.
Sa inisyal na pagsisiyasat ng Taytay Municipal Police, alas-10:00 ng gabi nang maganap ang krimen sa St. Mary Palmera 3, sa Brgy. Dolores, Taytay.
Nauna rito, nagtungo ang biktima sa naturang lugar upang dalawin sana ang kanyang dating kinakasama na si Mary Jane, 35, housekeeper.
Gayunman, nagalit umano ang biktima nang makita sa lugar ang kanyang karibal (suspek), na siya namang kasalukuyang kinakasama ni Mary Jane, kaya nauwi sa mainitang pagtatalo at suntukan ng dalawa.
Sa kasagsagan ng suntukan, bumunot umano ng patalim ang suspek at kaagad na pinagsasaksak ang biktima na ikinasawi nito.
Mabilis namang tumakas ang suspek, na target na ngayon ng manhunt operation ng mga awtoridad.
- Latest
