Lalaki nagtangkang manloob sa kantina, todas sa sekyu
MANILA, Philippines — Nabaril at napatay ng isang guwardiya ang isang lalaking umano’y pumasok at nagtangkang manloob sa kanyang binabantayang kantina sa Antipolo City, Rizal kamakalawa.
Inaalam pa ng mga awtoridad ang pagkakakilanlan ng napatay na suspek habang nasa kustodya na ng mga awtoridad ang guwardiya na kinilala lang sa alyas na “Joey”.
Lumilitaw sa imbestigasyon ng Antipolo City Police na alas-4:50 ng madaling araw nang maganap ang insidente sa loob ng Lutong Bahay Canteen, sa XRC Building, East Kamias, Brgy. Sta. Cruz, sa Antipolo City.
Pinasok umano ng lalaki ang kantina at naaktuhan naman siya ng guwardiya kaya kaagad na inutusan upang lumabas.
Sa halip na lumabas, tinangka pa umano ng lalaki na manlaban at sugurin ang guwardiya kaya dito na niya pinaputukan ng kanyang .9mm service firearm.
Nagtamo ng tama ng bala sa panga ang lalaki at agad na isinugod sa Antipolo District Hospital ng mga rumespondeng miyembro ng Sta. Cruz Rescue ngunit idineklara na ring patay ng mga doktor.
Inaresto naman ang guwardya at dinala ng mga tauhan ng Police Community Precinct 2 (PCP-2) ng Antipolo Component City Police Station, sa presinto upang maimbestigahan at masampahan ng kaukulang kaso.
- Latest
