Barangay treasurer, 2-anyos anak utas sa ambush!
COTABATO CITY, Philippines — Agad na namatay sa mga tama ng bala ang isang barangay treasurer at kanyang 2-taong gulang na anak na babae habang sugatan ang isa pa nilang kamag-anak nang tambangan ng mga armadong kalalakihan sa Barangay Rosary Heights 7, dito sa lungsod nitong Biyernes ng hapon.
Hindi na umabot nang buhay sa hindi kalayuang Cotabato Regional Medical Center ang mga biktima na sina Mhads Mamantal, isang Moro Maguindanaon, at ang anak na si Norlyn, matapos silang isinugod ng mga emergency responders upang malapatan sana ng lunas.
Sa pahayag nitong Sabado ni Col. Querubin Manalang, Jr., Cotabato City police director, sakay ng isang puting minivan ang mag-ama, galing sa isang bangko at may dalang P1.4 million na cash, nang sila ay tambangan at pagbabarilin pagsapit sa may Oblate Drive sa Barangay Rosary Heights 7 ng mga salarin na mabilis na nagsitakas sakay ng mga motorsiklo.
Sugatan naman sa naturang ambush si Saddam Mamantal, malapit na kamag-anak ng napaslang na barangay treasurer ng Barangay Mother Bagua, dito sa lungsod.
Naniniwala si Manalang at mga imbestigador ng Cotabato City Police Office na tanging ang napaslang na barangay treasurer ang target ng mga mga suspek dahil hindi naman nila tinangay ang P1.4 milyon na halaga ng pondo ng barangay government na nasa loob ng sasakyan nito.
- Latest