Dinagyang Festival sa Iloilo, arangkada na

MANILA, Philippines — Handa na ang lungsod ng Iloilo na muling ipakitang-gilas sa buong mundo ang kanilang kultura, talento, at pananampalataya sa ina­abangang pinaka-highlight ng pagdiriwang ng Dinagyang Festival 2024.

Opisyal na nagbukas ang Dinagyang noong Enero 12 at gaganapin ang highlight nito sa Ene­ro 27 hanggang 28.

Iniimbatahan naman ni City Mayor Jerry P. Treñas ang lahat na bumisita sa Iloilo lalo na ang hindi pa nakakaranas na mag-Dinagyang.

Bilang Best Tourism Event ng bansa, malaki ang ambag ng Dinagyang Festival upang lalong makilala ang lungsod ng Iloilo bilang tourism destination.

Ngayong taon, walong paaralan sa lungsod ang maglalaban-laban sa main tribe competition sa Enero 28 ng umaga. Bago ang competition, isang concelebrated High Mass sa San Jose Parish Placer ang gaganapin alas-sais ng umaga.

Sa “Kasadyahan sa mga Kabanwahanan Festival” naman sa Enero 27, nasa 9 na festival mula sa iba’t ibang bayan ng Iloilo ang mag-aagawan para sa unang puwesto.

Samantala, sa Enero 26 sa Dinagyang ILOmination Streetdance Competition at Floats Parade of Lights, pitong tribu mula sa bawat distrito ng lungsod ang maglalaban-laban. Gaganapin ito sa new business district sa Ayala-SM-Megaworld area sa distrito ng Mandurriao.

Magkakaroon din ng pagkakataon ang publiko na makisayaw at maki­pag-litrato bilang souvenir kasama ang Dinagyang warriors sa gaganapin na Sadsad sa Calle Real sa Enero 27 mula alas-2 ng hapon sa downtown area ng City Proper.

Isa pang major event na dinadagsa lalo ng mga deboto sa Dinagyang ay ang Grand Religious Sadsad sa Enero 27, 2024, alas-siete ng gabi sa San Jose Parish Placer.

Kumpirmadong dadalo sa Dinagyang ang matataas na opis­yales na sina H.E. Andres Michael Pfaffernoschke, Ambassador ng Embassy of Germany; H.E. Dato’ Aboul Malik Melvin Castelino, Ambassador ng Embassy of Malaysia; Richard Young Ybañez, president, Iloilo International Association; Evan P. Garcia, Ambassador ng Embassy of Norway; mga senador na sina Risa Hontiveros, Bong Revilla, Lito Lapid, Bong Go, at Joel Villanueva; at ilang congressman ng bansa.