Miyembro ng ‘Barrera Drug Group’ natimbog
CAVITE, Philippines — Arestado ang isang kasapi ng kilabot na “Barrera Drug Group” na kabilang sa mga high value target (HVT) ng pulisya sa kanilang inilatag na buy-bust operation kamakalawa ng gabi sa Brgy. San Agustin 1, Dasmariñas City.
Kinilala ng pulisya ang suspek na si John Mark Estrabon Marcelo alias “John Carlo Lumibao”, nasa hustong gulang at residente ng Brgy. San Agustin 1, Dasmariñas City, Cavite.
Sa nakalap na ulat mula kay Police Col. Marlon Solero, hepe ng pulisya sa lungsod, alas-7:30 ng gabi nang magkasa ng anti-drug operation ang pinagsanib na puwersa ng Provincial Drug Enforcement Unit, Cavite-Provincial Police Office at Dasmariñas City Police laban sa suspek .
Nang magpositibo ang transaksyon, agad na dinakma ang suspek at nakumpiska rito ang limang plastic sachet ng mahigit sa 5 gramo ng shabu na aabot sa halagang P34,000 at mga drug paraphernalia.
- Latest
