Magsasaka utas sa taga ng ulyaning 81-anyos

SANTIAGO CITY, Isabela, Philippines — Isang magsasaka ang nasawi matapos pagtatagain ng isang 81-anyos na lolong ulyanin sa Purok 5, Divisoria sa lungsod na ito, kamakalawa ng hapaon.

Nakilala ang biktima na si Jerry Estanislao, 51, habang ang suspek ay si Loreto Gadiano, 81, isa ring magsasaka at kapwa residente sa nasabing lugar.

Batay sa inisyal na imbestigasyon ng pulisya, nagpapahinga umano ang biktima sa kanyang duyan nang lapitan ng lolong si Gadiano dakong alas-2:30 ng hapon.

Dito, kinompronta umano ng lolo si Estanislao kaugnay sa kanyang pagkakautang na tinawanan naman ng biktima na naging dahilan para mainis ang suspek.

Nagtamo ng malubhang mga sugat sa katawan ang biktima na nagawa pang magpasaklolo, subalit, binawian din ito ng buhay matapos isugod sa pagamutan. Nadakip naman ang suspek sa isang canal matapos ang isinagawang pagtugis ng mga operatiba ng pulisya.

Lumalabas na wala naman umanong utang ang biktima sa suspek at tila nag-uulyanin na ang suspek dahil sa katandaan.