Sanggol nilapa ng 2 baboy
MANILA, Philippines — Malagim ang sinapit ng isang bagong silang na sanggol na lalaki matapos lapain ng dalawang baboy nang itapon sa loob ng piggery ng hindi pa nakilalang salarin sa Sitio Bantud, Brgy. Buis, New Washington, Aklan kamakailan, ayon sa pulisya nitong Huwebes.
Sa naantalang ulat ng Aklan Police, nangyari ang insidente noong Disyembre 25 ng gabi sa kural ng baboy na pag-aari ng matandang lalaking si Francisco Natabio na naninirahan sa nasabing lugar.
Ang bangkay ng bagong silang na sanggol na wala nang mga kamay at tadtad ng mga kagat ng baboy ay natagpuan noong umaga ng Disyembre 26.
Ayon kay Natabio, magpapakain sana siya ng dalawang alaga niyang baboy nang madiskubre ang insidente.
Nakakabit pa ang umbilical cord ng sanggol nang matagpuan kung saan wala itong damit at putol na ang dalawang kamay na pinaniniwalaang nilapa ng mga baboy.
Sa inisyal na imbestigasyon ng pulisya, may narinig na iyak ng sanggol ang matanda sa labas ng kanilang tahanan noong gabi ng Pasko kung saan malakas ang ulan at madilim ang paligid.
Samantalang nakabukas din ang tarangkahan ng matanda patungo sa kural ng baboy kung saan naghihinala ang mga awtoridad na inihagis ang munting anghel sa kulungan ng baboy ng walang pusong salarin.
- Latest
