2 vintage bomb natagpuan

STA ROSA, Nueva Ecija, Philippines — Dalawang World War ll vintage bomb ang natagpuan sa magkaibang lugar sa bayang ito sa loob lang ng dalawang linggo, kung saan nadiskubre nitong Sabado ang ikalawang bomba sa Barangay Luna, dakong 10:40 ng umaga.

Ayon kay P/Major Fortune Dianne Bernardo,  hepe ng pulisya rito, natagpuan ng magbabakal at magboboteng si June Alarcon, 42, ng Brgy. Luna ang isang bomba habang nagbubungkal ng “kalakal” sa isang bakanteng lote na malapit lang sa tinitirhan nito. Agad nitong iniulat sa pulisya ang natagpuang bomba at kanyang isinuko.

Nauna rito, noong Disyembre 23,  natagpuan din ng 52-anyos na magsasakang si Moises Sapiandante, ng Brgy. Gomez habang naglilinis ng natuyong palaisdaan ang  isang vintage bomb. Kasalukuyang nag-aalis ng damo si Sapiandante gamit ang grass cutter nang matamaan nito ang bomba, dakong 11 ng umaga at masuwerteng hindi sumabog.

Nasa pag-iingat na ng Nueva Ecija Provincial Explosive and K-9 Unit na nakabase sa Cabanatuan City ang natagpuang mga bomba.