4-anyos na paslit, nalunod sa kanal

NORTH COTABATO, Philippines — Hindi na umabot ng buhay sa ospital ang 4-anyos na si Angelo Salvador Almirol makaraang malunod sa isang kanal na malapit sa kanilang bahay sa Purok 3, Barangay Katidtuan, Kabacan, kamakalawa.

Batay sa imbestigasyon, alas-6:30 ng gabi nang mahulog at malunod ang bata sa kanal habang abala ang kanyang amain sa paghahanda ng kanilang hapunan.

Nabatid na ang gagawin sanang septic tank ang nasabing kanal na malapit lamang sa kanilang bahay, dahil sa patuloy na nararanasang pag-ulan ay napuno ito.

Madalas naman umanong naglalarong mag-isa ang bata sa nasabing kanal na naging paliguan sa pag-aakala ng amain na mababaw lang ang tubig.