2 robbery suspect dedo sa shootout

MALOLOS CITY, Philippines  - Patay ang dala­wang hinihinalang robbery suspect matapos umanong  makipagba­rilan sa mga pulis kamakalawa ng mada­ling araw sa Baliwag, Bulacan.

Kinilala ni P/Col. Lawrence Cajipe, provincial director ng Bulacan Police ang mga nasawing suspek na sina Rey Samonte at Reynold Tamayao.

Sa ulat, alas-2:10 ng madaling-araw ng nasabing araw ay nakatanggap ng tawag sa telepono ang Baliwag Police mula kay Enguerra Jeason, isang security guard ng Wilcom Depot na matatagpuan sa DRT Hi-way Brgy. Tarcan, Baliwag. Isang nakawan umano ang nagaganap sa Panrama Technologies kasabay rin ng report mula kay Joey Flores, 41, ng Cunanan St. Brgy. Sto. Cristo, Baliwag, Bulacan na kinarnap umano ang kanyang motorsiklo.

Sa pangunguna ni P/Lt. Col. Jayson San Pedro, hepe ng Baliwag Police, agad nilang inalerto ang Bulacan Tactical Operation Center hinggil sa deskripsyon ng mga suspek na nagtugma sa mga nangholdap sa Panrama. Eksaktong malapit sa lugar ng pinangyarihan ang mga tauhan ng Bulacan Provincial Intelligence Branch sa pangunguna ni P/Maj. Jansky Andrew Jaafar kaya agad rumesponde.

Tumakas ang mga suspek sakay ng ina­gaw na motorsiklo mula kay Flores nang mapansin ang mga paparating na pulis hanggang sa mauwi sa ilang minutong habulan at nang makorner sa gawing bypass road ay dito na nagkaroon ng palitan ng putok na ikinabulagta ng mga suspek at idineklarang dead-on-arrival sa Baliwag District Hospital alas-2:45 ng umaga.