CAFGU, dakma sa kasong rape

SANTIAGO CITY, Isabela, Philippines — Isang miyembro ng Citizen Armed Forces Geographical Unit (CAFGU) ang dinakip ng mga awtoridad sa loob mismo ng kanilang barracks dahil sa kasong panggagahasa sa bayan ng San Mariano, lalawigang ito, kamakalawa ng hapon.

Kinilala ang naarestong akusado na si Angelito Amistoso, 18, residente ng Barangay San Jose sa bayan ng San Mariano at kasalukuyang nakatalaga bilang miyembro ng CAFGU 95th Infantry Battalion ng Philippine Army na nakabase sa nasabing bayan.

Napag-alaman na hindi na nakapalag si Amistoso sa mga operatiba ng pulisya nang isilbi ang warrant of arrest na ipinalabas ni Judge Raul Babaran ng RTC branch 19, Cauayan City laban sa kanya sa loob ng kampo ng militar sa Barangay Zone 1, San Mariano dakong alas-5:00 ng hapon nitong Sabado.

Walang inirekomendang piyansa ang korte para sa kasong rape laban sa naturang CAFGU Member.