Maghahatid ng inumin sa quake victims water tanker bumaligtad: Helper pisak
NORTH COTABATO, Philippines — Isang helper ang minalas na masawi matapos na madaganan ng bumaliktad na water tanker na maghahatid sana ng inuming tubig para sa mga nabiktima ng lindol habang bumabagtas sa National Highway ng Purok 11, Sitio Patulangon, Brgy. Poblacion sa Makilala, Cotabato kahapon ng umaga.
Sa report ng Makilala Police Traffic Section sa pangunguna ni P/MSg Xerxes Anthony Fiel, nakilala lamang ang nasawing biktima sa alyas “Nonoy” at nakatira sa Catiil Compostela Valley.
Lumalabas sa imbestigasyon na habang binabagtas ng water tanker na minamaneho ni Jimmy Calolo Gaspar Caber, 50- anyos, company driver ng Jora Tracking Services ang highway at patungo na sana sa bayan nang pagsapit sa lugar ay pumalya umano ang sasakyan. Dito, mawalan ng kontrol sa manibela ang nasabing drayber sanhi upang bumaliktad ang sasakyan.
Nabatid na ihahatid lamang sana nila ang pitong toneladng tubig ng Dumoy Fresh Water sa mga bakwit ng bayan nang maganap ang ‘di inaasahang insidente.
Dahil sa impact, bumaligtad at napahiwalay ang ulo ng truck sa dalang tangke na nabutas din at tumapon ang tubig. Sa kamalasan ay nadaganan pa ang nasabing helper na agarang nasawi sa lugar habang nasugatan ang naturang driver.
- Latest
