Bangka lumubog sa Quezon, 7 nasagip

PATNANUNGAN, Quezon, Philippines — Nakaligtas sa tiyak na kapahamakan at nakauwi na sa kanilang pamilya ang 7 tripulante ng isang cargo moto­rized banca na lumubog sa karagatang sakop ng ­bayang ito dahil sa malalaking alon kamakalawa.

Ayon sa Philippine Coast Guard-Northern Quezon, alas-10:15 ng umaga ay nakatanggap sila ng report na merong lumubog na cargo ship.

Mabilis na tinungo ng CGS ang lugar at sa tulong ng MB JRAMS, MB Jovelle at iba pang flatboat ay na-rescue nila ang mga tripulante ng MB Krystal Faith.

Ayon sa salaysay ng mga tripulante sa mga otoridad, patungo sa Atimonan, Quezon ang cargo banca na kanilang sinasakyan upang kumuha ng mga produktong paninda sa Patnanungan, Quezon nang hampasin sila ng malalakas at malalaking alon hanggang sa lumubog.

Nahila na rin ng PCG ang motorized banca patungo sa pampang ng Patnanungan, Quezon.