‘Mag-lover’ natagpuang patay sa motel

NORTH COTABATO, Philippines - Patay na nang matagpuan ang multicab driver at sinasabing kalaguyo nito sa kanilang silid sa isang lodging house sa Barangay City Heights, General Santos city sa South Cotabato, kahapon ng madaling araw.

Kapwa may saksak sa dibdib ang dalawa na kinilalang si Gilbert Calipes, 38, may asawa at nakatira sa Brgy. Fatima habang ang kasama nitong babae ay napag-alamang si Leony Bunayog, 44, may asawa at may mga anak din.

Nagtaka umano ang management ng lodging house matapos na hindi pa rin lumalabas ang dalawa dahil sa 12-oras na ang nakalipas matapos mag-check-in.

Bandang alauna ng madaling araw nang pasukin ng ilang staff ng motel ay bumungad ang duguang katawan ng dalawa na nakahandusay sa sahig.

Narekober ang ginamit na kitchen knife na nakabaon pa sa dibdib ng lalaki.

Iniimbestigahan ng pulisya kung sadyang nagpakamatay ang dalawa, lalo pa’t wala umanong narinig na komosyon sa loob bago nakitang patay ang dalawa.