Tinedyer inutas ng nakaalitan

CAVITE, Philippines – Bulagta ang 17-anyos na lalaki matapos itong barilin ng dati nitong nakaalitan sa Barangay San Roque, Cavite City, Cavite kahapon ng madaling araw. Kinilala ng pulisya ang biktima na si Jerald Son Luna habang  pinaghahanap naman ang suspek na si  Aton Cruz, 25, ng Lopez Jaena Street sa Barangay 36. Sa ulat na nakarating sa Camp Pantaleon Garcia, nagmomotorsiklo ang biktima kasama ang kaibigang lalaki nang tawagin ng suspek na lulan ng van na nakaparada. Sa pag-aakalang kakilala ay huminto ito saka kinausap subalit pinutukan ng suspek ang biktima sa bisinidad ng H. Del Trabajo Street sa nasabing barangay. Tinamaan ng ligaw na bala ang kaangkas ng biktima kung saan nakilala nito ang gunman.