Lola nilikida sa traysikel

BULACAN, Philippines  – Pinabulagta ang 58-anyos na lola matapos itong pagbabarilin ng mga di-kilalang kalalakihan sa kahabaan ng highway sa Barangay Sto. Niño, bayan ng Baliwag, Bulacan kamakalawa ng hapon. Kinilala ang biktima na si Purificacion Enriquez habang hindi naman idinamay sa pamamaril ang asawa nitong si Romerico Enriquez, 58; apo nitong 4-anyos na mga nakatira sa Brgy. Tibag; at  ang 15-anyos na lalaki na nakatira sa Brgy. Dulong Malabon sa bayan ng Pulilan. Sa imbestigasyon nina SPO1 Ariel Modelo at PO3 Jesrael Yaweh Giron, lulan ng traysikel ang mga biktimang papauwi nang harangin ng mga di-kilalang lalaki na lulan ng tatlong motorsiklo pagsapit sa Baliwag-Candaba Road. Dito na bumaba ang isa sa gunmen saka pinaputukan ang biktima habang hindi naman idinamay ang iba pang kasama nito.