2 tinedyer lunod sa beach resort

LEGAZPI CITY, Albay, Philippines – Magkasunod na sinalubong ni kamatayan ang magkaibigang tinedyer matapos na malunod sa Palong Beach Resort sa Sitio Dinognaan, Barangay Mataque sa bayan ng Capalonga, Camarines Norte kamakalawa ng hapon. Naisugod pa sa Capalonga Medicare Hospital subalit namatay din sina Dante Paquita Jr., 17; at Raynold Atienza, 15, habang nasa malubhang kalagayan naman ang kasamahan ng dalawa na si Marvin Tapin, 17, mga nakatira sa Barangay Tananuan sa nabanggit na bayan. Ayon sa ulat ng pulisya, magkakasamang naligo ang mga biktima sa nasabing resort nang mapagawi sa malalim na bahagi ng dagat kaya magkakasabay na nalunod. Nagawa namang makuha ang mga biktima saka dinala sa nasabing ospital subalit namatay ang dalawa.